थकीत पीक-विमा २०२४ चे वाटप सुरू ; या जिल्ह्यात…
बुलढाणा जिल्ह्यातील शेतकऱ्यांसाठी एक अत्यंत दिलासादायक आणि महत्त्वपूर्ण बातमी समोर आली आहे. प्रलंबित असलेल्या खरीप पीक विमा २०२४ च्या वाटपाला अखेर सुरुवात झाली आहे. खरीप हंगाम २०२४ मध्ये बुलढाणा जिल्ह्यासाठी ६०० कोटी रुपयांपेक्षा जास्त रकमेचा पीक विमा मंजूर करण्यात आला होता. यापूर्वी शेतकऱ्यांच्या खात्यामध्ये सुमारे ३३४ कोटी रुपयांची रक्कम वितरित करण्यात आली होती, परंतु त्यानंतरही मोठ्या प्रमाणात पीक विमा वाटप होणे बाकी होते.
या थकीत रकमेसाठी राज्य शासनाने आवश्यक असलेले जवळपास १२१ कोटी रुपयांचे पूरक अनुदान पीक विमा कंपनीला दिले होते. हे अनुदान मिळाल्यानंतर लगेच वाटप होईल, अशी शक्यता असतानाही वितरण प्रक्रिया थांबली होती. त्यामुळे शेतकरी नेते रविकांत तुपकर यांनी मोठे आंदोलन केले, तसेच श्वेता महाले यांच्यासह इतर स्थानिक लोकप्रतिनिधींनी देखील वेळोवेळी या पीक विम्यासाठी सातत्याने पाठपुरावा केला.
या सर्व प्रयत्नांना यश येऊन, अखेर याच मंजूर असलेल्या पीक विमा रकमेपैकी २१२ कोटी रुपयांच्या पीक विम्याचे वितरण बुलढाणा जिल्ह्यातील शेतकऱ्यांना सुरू करण्यात आले आहे. या महत्त्वपूर्ण वाटपामुळे जिल्ह्यातील जवळपास ६८,००० पेक्षा जास्त पात्र शेतकऱ्यांच्या खात्यामध्ये पीक विम्याची रक्कम जमा होणार आहे. जिल्ह्याच्या थकीत असलेल्या ४० ते ४५% पीक विम्यापैकी ही रक्कम वितरीत होत आहे.
या वाटपामुळे बुलढाणा जिल्ह्यातील शेतकऱ्यांना मोठा आर्थिक आधार मिळणार आहे. याचप्रमाणे, खरीप २०२४ मधील इतर जिल्ह्यांतील शेतकरी देखील त्यांच्या पीक विम्याच्या प्रतीक्षेत आहेत. त्या जिल्ह्यांसाठीचे अपडेट्स देखील लवकरच उपलब्ध होतील, अशी अपेक्षा आहे.
