सोयाबीन हमीभाव नोंदणी ; खरीप हंगाम २०२५ करिता केंद्र शासनाने राज्यातील शेतकऱ्यांच्या सोयाबीन, मूग आणि उडीद या पिकांची हमीभावानं खरेदी करण्यास मंजुरी दिली आहे. या योजनेअंतर्गत, राज्यामध्ये सुमारे ७.५ लाख मेट्रिक टन सोयाबीनची खरेदी करण्याचे उद्दिष्ट ठेवण्यात आले आहे. शेतकऱ्यांना त्यांच्या शेतमालाला योग्य दर मिळावा या हेतूने ३१ ऑक्टोबर २०२५ पासून या तिन्ही शेतमालाच्या हमीभाव खरेदीसाठी नोंदणी प्रक्रिया सुरू झाली आहे. ही नोंदणी प्रक्रिया पूर्ण करण्यासाठी शेतकरी ई-समृद्धी पोर्टल/ॲप्लिकेशन वापरू शकतात किंवा आपल्या जवळच्या हमीभाव खरेदी केंद्रावर जाऊन नोंदणी करू शकतात.
यंदाच्या नोंदणी प्रक्रियेत सर्वात महत्त्वाचा बदल म्हणजे शेतकऱ्यांचे फेस व्हेरिफिकेशन (चेहरा प्रमाणीकरण) किंवा बायोमेट्रिक व्हेरिफिकेशन अनिवार्य करण्यात आले आहे. या व्हेरिफिकेशनमुळे केवळ खऱ्या शेतकऱ्यांचाच शेतमाल हमीभावानं विकला जाईल, हे सुनिश्चित होते. ऑनलाईन नोंदणीसाठी शेतकऱ्याला मोबाईलमध्ये दोन ॲप्लिकेशन्सची आवश्यकता आहे: ई-समृद्धी आणि फेस आधार आरडी. ई-समृद्धी ॲप डाऊनलोड केल्यानंतर, मोबाईल नंबर टाकून आणि ओटीपीद्वारे लॉगिन करून नोंदणीची प्रक्रिया सुरू करता येते. सर्वप्रथम, शेतकऱ्याला आपली वैयक्तिक माहिती भरावी लागते आणि त्यानंतर आधार पडताळणी करणे बंधनकारक आहे, जे फेस व्हेरिफिकेशनद्वारे (फेस आधार आरडी ॲप वापरून) पूर्ण केले जाते.
